*హైదరాబాద్‌లో ఘనంగా అయ్యప్ప మంత్రదీక్ష – మంత్రోపదేశ మహోత్సవం* --- తొలిసారిగా కేరళ తాంత్రిక సంప్రదాయంలో అయ్యప్ప పూజా భక్తుల సమ్మేళనం ---- కేరళ తంత్ర సంప్రదాయంలో రెండు రోజుల ఆధ్యాత్మిక కార్యక్రమం ---- సెప్టెంబర్ 6వ తేదీన ప్రస్తుతం ఇప్పటికే శిక్షణ పొందుతున్న విద్యార్థులకు ప్రాక్టికల్ తరగతులు --- సెప్టెంబర్ 7వ తేదీన మంత్రోపదేశం తీసుకునేందుకు నమోదు చేసుకున్న ఔస్థాహికుల కోసం --- మంత్రోపదేశం తీసుకునేందుకు సెప్టెంబర్ 4వ తేదీలోపు నమోదు చేసుకోవాలి

*నేటిసాక్షి హైదరాబాద్*

అయ్యప్ప స్వామి భక్తులకు ఆధ్యాత్మికంగా విశిష్టమైన అవకాశాన్ని కల్పించే ఉద్దేశంతో కేరళ తంత్ర సంప్రదాయ అయ్యప్ప మంత్రదీక్ష, మంత్రోపదేశ మహోత్సవాన్ని హైదరాబాద్‌లో నిర్వహించేందుకు ఏర్పాట్లు చేస్తున్నట్లు నిర్వాహకులు కే. నిరంజన్ రావు తెలిపారు. సంప్రదాయబద్ధమైన తాంత్రిక విధానాలు, పూజలు, హోమాలు, మంత్రోపదేశం తదితర ఆధ్యాత్మిక కార్యక్రమాలతో ఈ మహోత్సవాన్ని నగరంలో తొలిసారిగా కేరళ సంప్రదాయబద్ధమైన అయ్యప్ప పూజా విధానాలను అభ్యసించిన భక్తుల భారీ సమ్మేళనంతో రెండు రోజుల పాటు (సెప్టెంబర్ 6, 7 తేదీల్లో) నిర్వహించనున్నారు.
ఈ రెండు రోజుల భక్తుల సమ్మేళనంలో కేరళ ప్రభుత్వ గుర్తింపు పొందిన చెంగన్నూర్ మంత్ర విద్యాపీఠంకు చెందిన తాంత్రిక గురుకులంలో ప్రామాణిక ఆలయ పూజా విధానాలు, ఆచారాలను అభ్యసించిన అయ్యప్ప భక్తులు పాల్గొననున్నారు.
ఈ సందర్భంగా పవిత్రమైన అయ్యప్ప మంత్రోపదేశం (ఆధ్యాత్మిక దీక్ష) కూడా నిర్వహించనున్నారు. దేశంలోని వివిధ రాష్ట్రాలతో పాటు ఆంధ్రప్రదేశ్, తెలంగాణ రాష్ట్రాల్లోని వివిధ ప్రాంతాల నుంచి పెద్ద సంఖ్యలో అయ్యప్ప భక్తులు ఈ కార్యక్రమానికి హాజరుకానున్నట్లు నిర్వాహకులు తెలిపారు.

ఈ కార్యక్రమంలో కేరళకు చెందిన ప్రముఖ తంత్ర గురువు, మంత్ర విద్యాపీఠం అధిపతి బ్రహ్మశ్రీ టి.డి.పి. నంబూద్రి గురూజీ ఆధ్వర్యంలో ప్రత్యేక పూజలు, తాంత్రిక సంప్రదాయబద్ధమైన అయ్యప్ప ఆరాధనా కార్యక్రమాలు నిర్వహించనున్నారు. కేరళ ఆలయ సంప్రదాయాలకు అనుగుణంగా అయ్యప్ప స్వామి పూజా విధానాలను భక్తులకు మరింతగా పరిచయం చేయడం, ఆధ్యాత్మిక అవగాహన పెంపొందించడం ఈ సమ్మేళనం ప్రధాన ఉద్దేశ్యంగా నిర్వాహకులు పేర్కొన్నారు.గురువు సన్నిధిలో సంప్రదాయ విధానాలను అనుసరిస్తూ శ్రీ అయ్యప్ప స్వామి ఆరాధన, మంత్రదీక్ష, మంత్రోపదేశం తదితర కార్యక్రమాలు నిర్వహించనున్నట్లు నిర్వాహకులు వెల్లడించారు. భక్తులకు ఆధ్యాత్మిక మార్గదర్శకత్వం అందించడంతో పాటు అయ్యప్ప ఆరాధనా విధానాలపై అవగాహన కల్పించడమే కార్యక్రమ ప్రధాన ఉద్దేశ్యమని తెలిపారు.
• రెండు రోజుల పాటు ప్రత్యేక కార్యక్రమాలు...
మొదటి రోజు సెప్టెంబర్ 6, 2026 ఆదివారం వివిధ ఆధ్యాత్మిక కార్యక్రమాలను నిర్వహించనున్నారు. ఉదయం ప్రస్తుతం ఇప్పటికే శిక్షణ పొందుతున్న విద్యార్థులకు ప్రాక్టికల్ శిక్షణ కార్యక్రమం, అనంతరం అయ్యప్ప భజన కార్యక్రమాలు ఉంటాయని నిర్వాహకులు పేర్కొన్నారు. భక్తులు సమయానికి హాజరై కార్యక్రమాల్లో పాల్గొనాలని సూచించారు.
రెండో రోజు సెప్టెంబర్ 7వ తేదీ సోమవారం ప్రధానంగా మంత్రోపదేశం తీసుకునేందుకు నమోదు చేసుకున్న ఔస్థాహికులకు అయ్యప్ప మంత్రోపదేశ మహోత్సవం నిర్వహించనున్నారు. మంత్రోపదేశం తీసుకునేందుకు సెప్టెంబర్ 4వ తేదీ లోపు నమోదు చేసుకునే అవకాశం ఉందని నిర్వాహకులు తెలిపారు. ఉదయం ప్రారంభమయ్యే మంత్రోపదేశం కార్యక్రమం మధ్యాహ్నం వరకు కొనసాగనుంది. మంత్రదీక్ష, మంత్రోపదేశంతో పాటు సంప్రదాయ పూజా కార్యక్రమాలు నిర్వహించనున్నట్లు తెలిపారు.
• ఆధ్యాత్మిక అనుష్ఠానాలకు ప్రత్యేక ప్రాధాన్యం...
ఈ మహోత్సవంలో భాగంగా మహాగణపతి హోమం, పితృ వందనం, పూజా కార్యక్రమాలు, కలశ పూజ, అభిషేకం, మాతృ వందనం, మంత్రోపదేశం, భిక్షాకరణం తదితర ధార్మిక కార్యక్రమాలను నిర్వహించనున్నారు. మహాగణపతి హోమం ద్వారా కార్యక్రమానికి విఘ్నాలు తొలగి శుభప్రదమైన వాతావరణం ఏర్పడాలని ప్రార్థనలు చేయనున్నారు. పితృ వందనం ద్వారా పూర్వీకులను స్మరించుకోవడం, పూజా కార్యక్రమాల ద్వారా ఆధ్యాత్మిక శ్రద్ధను పెంపొందించడం, కలశ పూజ–అభిషేకం ద్వారా సంప్రదాయ ఆచారాలను నిర్వహించడం వంటి కార్యక్రమాలకు ప్రాధాన్యత ఇవ్వనున్నట్లు వివరించారు. అలాగే అయ్యప్ప స్వామి భక్తులు గురువు మార్గదర్శకత్వంలో మంత్రోపదేశాన్ని స్వీకరించి తమ ఆధ్యాత్మిక సాధనను కొనసాగించేందుకు ఈ కార్యక్రమం ఉపయోగపడుతుందని నిర్వాహకులు తెలిపారు.
• హైదరాబాద్‌లో ప్రత్యేకంగా నిర్వహణ...
ఈ కార్యక్రమాన్ని హైదరాబాద్‌లోని గుడ్ల పోచంపల్లి లో ఉన్న ఏవిఆర్ కన్వెన్షన్ హాల్ నిర్వహించనున్నారు. హైదరాబాద్‌తో పాటు వివిధ రాష్ట్రాలు, తెలంగాణలోని వివిధ ప్రాంతాల నుంచి అయ్యప్ప భక్తులు, స్వాములు కార్యక్రమానికి హాజరయ్యే అవకాశం ఉందని నిర్వాహకులు తెలిపారు.
కార్యక్రమానికి వచ్చే భక్తుల సౌకర్యార్థం పరిమిత సంఖ్యలో వసతి సదుపాయం కూడా ఏర్పాటు చేసినట్లు వెల్లడించారు. సుమారు 30 మంది వరకు వసతి కల్పించే అవకాశం ఉన్నందున ముందుగా నమోదు చేసుకోవాలని సూచించారు.
• సంప్రదాయబద్ధమైన మంత్రదీక్షకు అవకాశం...
అయ్యప్ప స్వామి ఆరాధనలో గురువు మార్గదర్శకత్వానికి, మంత్రదీక్షకు ప్రత్యేక ప్రాధాన్యత ఉందని నిర్వాహకులు పేర్కొన్నారు. కేరళ తంత్ర సంప్రదాయ పద్ధతులను అనుసరించి నిర్వహించే ఈ కార్యక్రమం ద్వారా భక్తులు సంప్రదాయ ఆధ్యాత్మిక విధానాలను తెలుసుకునే అవకాశం ఉంటుందని తెలిపారు. మంత్రదీక్ష తీసుకోవాలనుకునే భక్తులు, అయ్యప్ప స్వామి ఆరాధనలో మరింత లోతైన ఆధ్యాత్మిక సాధన చేయాలనుకునే వారు, స్వాములు, భక్తులు ఈ కార్యక్రమంలో పాల్గొనాలని కోరారు.
• భక్తులకు నిర్వాహకుల పిలుపు...
అయ్యప్ప స్వామి భక్తులు, స్వాములు, ఆధ్యాత్మిక సాధకులు కార్యక్రమంలో పాల్గొని గురువుల ఆశీస్సులు పొందాలని నిర్వాహకులు పిలుపునిచ్చారు. కార్యక్రమానికి సంబంధించిన ఏర్పాట్లు, నమోదు, వసతి ఇతర వివరాల కోసం ముందుగా నిర్వాహకులను సంప్రదించాలని సూచించారు. మరిన్ని వివరాలు తెలుసుకునేందుకు నిర్వాహకులు కె. నిరంజన్ రావు గురూజీ ఫోన్ నెంబర్ 8712164646 ను సంప్రదించగలరు.