హెడ్లైన్ : మొహర్రం వేడుకలకు పోలీసుల అనుమతి తప్పనిసరి: ఎస్ఐ మారుతి

నేటి సాక్షి న్యూస్ జూన్ 19



పెద్దకడుబూరు మండలంలో ఈ నెల 26న జరగనున్న మొహర్రం వేడుకలకు పోలీసుల ముందస్తు అనుమతి తప్పనిసరిగా తీసుకోవాలని ఎస్ఐ మారుతి తెలిపారు. శుక్రవారం స్థానిక పోలీస్ స్టేషన్‌లో ఏర్పాటు చేసిన విలేకరుల సమావేశంలో ఆయన మాట్లాడుతూ, మండలంలోని గ్రామాల్లో మొహర్రం పండుగను నిర్వహించాలనుకునే నిర్వాహకులు ముందుగా పోలీసుల నుంచి అనుమతి పొందడంతో పాటు మీసేవ కేంద్రాల ద్వారా చలానా చెల్లించి రసీదు తీసుకోవాలని సూచించారు.
అనుమతి లేకుండా వేడుకలు నిర్వహించినా, కార్యక్రమాల సందర్భంగా శాంతిభద్రతలకు విఘాతం కలిగించినా కఠిన చర్యలు తప్పవని హెచ్చరించారు. మొహర్రం పండుగను భక్తిశ్రద్ధలతో, ప్రశాంత వాతావరణంలో నిర్వహించుకోవాలని, మత సామరస్యాన్ని కాపాడేలా ప్రతి ఒక్కరూ బాధ్యతాయుతంగా వ్యవహరించాలని కోరారు.
అలాయ్ తొక్కే కార్యక్రమాలు, ఊరేగింపుల సమయంలో సంయమనం పాటించాలని సూచించిన ఎస్ఐ, ఇతరుల మనోభావాలను దెబ్బతీసే చర్యలు, రెచ్చగొట్టే వ్యాఖ్యలు లేదా గొడవలకు పాల్పడిన వారిపై చట్టపరమైన చర్యలు తీసుకోవడంతో పాటు క్రిమినల్ కేసులు నమోదు చేస్తామని స్పష్టం చేశారు. పండుగ వేడుకలు ప్రశాంతంగా జరిగేందుకు ప్రజలు పోలీస్ శాఖకు సహకరించాలని ఆయన విజ్ఞప్తి చేశారు.